|
|
Бодлогод залуусын хяналт ТББ нь 2018 оноос хойш улс төрийн намын санхүүжилтийн ил тод байдлыг дээшлүүлэх, эрх зүйн орчныг сайжруулах зорилго бүхий "Улс төр ба мөнгө" хөтөлбөрийг хэрэгжүүлсээр байна. Хөтөлбөрийн хүрээнд бодлогын түвшинд нөлөөллийн үйл ажиллагааг хэрэгжүүлэхээс гадна олон нийт, залуус, судлаачдад улс төрийн намын санхүүжилтийн талаарх асуудал, мэдээ мэдээллийг хүргэх шаардлага тулгардаг. Энэхүү ажлын хүрээнд УИХ болон Ерөнхийлөгчийн сонгуулийн үеийн нам, нэр дэвшигчдийн хандив, зардлын тайланд хяналт тавьж, мониторинг хийх, сонгуулийн үеэр сайн дурын ажиглалт хийх, оюутан залуус, сэтгүүлчдийг улс төрийн асуудлаар мэргэшүүлэх хөтөлбөр, илтгэл, мэтгэлцээний тэмцээн зэргийг зохион байгуулдаг. Мөн цаг үеийн шинжтэй, залуус дуу хоолойгоо зайлшгүй хүргэх шаардлагатай нийгмийн асуудлуудад оролцож, өөрсдийн хувь нэмрийг оруулдаг. Тухайлбал 2019 онд "ҮХНӨ-д иргэдийн оролцоо" цахим аян, 2020-2021 онд "Шүүхийн хараат бус байдал ба иргэдийн оролцоо" цахим аянуудыг тус тус хэрэгжүүлж, тодорхой үр дүнд хүрсээр байгаа билээ. |